Kærleikur og atorka

„Kærleika og atorku hefur verið fórnað á þessum stað og hjörtun hafa tekið hann ástfóstri,“ segir sr. Friðrik Friðriksson við vígslu íþróttasvæðis Vals og Íslandsmeistararnir minna á það á skilti á Hlíðarenda. En þessi orð sr. Friðriks eiga ekki síður við um kirkjurnar okkar og helga staði. Það gæti vel átt við um Skálholtsstað en mér finnst einsog það eigi enn betur við um staðar-, bæjar- eða borgarkirkjuna sem er helgistaður þess samfélags sem trúir á Jesú Krist. Starfið byggist á kærleika og þjónustu. Þar er líka mesta ástfóstrið sem tengist oft átthögum fólksins eða heimabæ og hverfi. Ég setti mynd af Valsmerkinu fyrir yngsta son okkar sem er í Val og ekki verra að minna á Unicef og baráttuna fyrir velferð barna um allan heim sem við vinnum að með öllum kærleika okkar og atorku í öllum félögum og klúbbum og sannarlega í kirkjunni allri alltaf.