Ég þakka góðan stuðning

Ég þakka kærlega fyrir góðan stuðning í fyrri umferð í vígslubiskupskjörinu. Mér finnst mikilvægt að hafa hlotið flest atkvæði núna og finnst það vera staðfesting á þeirri niðurstöðu þegar ég hlaut flestar tilnefningar djákna og presta í ágúst en það var tilnefning til að vera í kjöri til vígslubiskups. Mín fyrstu viðbrögð eru að þakka sr. Axel Árnasyni Njarðvík fyrir einlæga boðun og framgöngu í öllu kynningarferlinu. Erindi sr. Axels var mikið og það á sérstaklega við um baráttuna í umræðunni um loftlagsbreytingar og sjálfbærni. Það er eitt stærsta málefni líðandi stundar og kom það skýrt fram á ráðstefnum Alkirkjuráðsins og Þjóðkirkjunnar sem við höfum verið að taka þátt í síðustu daga í Kópavogi og Hörpu.