Konur í góðum meirihluta á kirkjuþingi

Kynjahlutfall stórbatnar á kirkjuþingi með kosningunni í gær og óska ég kirkjunni til hamingju með að ná því langþráða takmarki. Konur eru núna í góðum meirihluta presta og djákna á kirkjuþingi sem er nálægt 60/40 og þegar hlutfall kvenna og karla hjá vígðum þjónum og fulltrúum sóknanefndanna er tekið saman eru konur 55% kirkjuþingsfulltrúa. Í heild eru 29 fulltrúar á kirkjuþingi og eru það 16 konur og 13 karlar. Kosið var til fjögurra ára og verður kirkjuþing að venju kallað saman í nóvember og þá er kosið í nefndir og ráð kirkjuþings.  Hlutfall kynja á síðasta kjörtímabili var lakara en þá voru kirkjuþingsfulltrúar 19 karlar og 10 konur. Leikmenn eru fulltrúar sókna landsins og vígðir eru fulltrúar prestakalla og vígðrar þjónustu. Auk kjörinna fulltrúa situr einn fulltrúi guðfræði- og trúabragðafræðideildar HÍ, vígslubiskupar og biskup Íslands en þeim til viðbótar á ráðherra sæti á kirkjuþingi eða fulltrúi ráðherra.