Aldrei fleiri á kjörskrá í vígslubiskupskjöri

Aldrei hafa fleiri verið á kjörskrá í vígslubiskupskjöri. Núna eru 937 fulltrúar að kjósa í umdæmi Skálholts og í fyrri umferðinni var kjörsókn um 68%. Til samanburðar má rifja upp að árið 2012 voru alls 502 fulltrúar á kjörskrá í kjöri til biskups Íslands og var kjörsókn þá 95%. Í síðasta kjöri til vígslubiskups á Hólum voru um 200 manns á kjörskrá. Í umdæmi Skálholts hefur fjöldi kjörmanna ríflega þrefaldast frá síðustu kosningu. Mesta fjölgunin er í röðum leikmanna vegna þeirrar nýbreytni að kjörnefndir kjósa núna biskupa til þjónustu sinnar. Kjörnefndir eru í hverju prestakalli og eru lágmarksfjöldi þeirra ellefu og eykst eftir fjölda sóknarbarna í fjölmennari prestaköllunum allt uppí tæplega þrjátíu. Það er óskandi að vígt og óvígt kirkjunnar fólk nýti vel þessa miklu fjölgun á kjósendum með enn meiri þátttöku en var í fyrri umferðinni í mars og sýni með því að það er vilji til enn meira fulltrúalýðræðis í málefnum kirkjunnar.